Мектепти сактоо — ар бирибиздин милдет
Кымбаттуу окуучулар!
100 жылдык тарыхы бар мектебибизге капиталдык оңдоп-түзөө иштери жүргүзүлүп, бүгүнкү күндө ал жаңы кейипке келип, жарык, таза жана кооз абалга жетти. Бул — ар бирибиз үчүн чоң кубаныч жана сыймык.
Мектеп — билимдин гана эмес, тарбиянын, адамдык баалуулуктардын очогу. Анын ар бир дубалы, партасы, китеп текчеси — мугалимдердин жана муундардын мээнети менен жаралган. Эми бул жарык жана ыңгайлуу шартты сактоо — бизден, сиздерден, урматтуу окуучулар, түздөн-түз көз каранды.
Ошондуктан, ар бир эмерекке, ар бир бурчка аяр мамиле кылып, тазалыкты сактап, мектеп мүлкүн өз үйүбүздөгүдөй көрүп, аны таза жана жарактуу абалда кармоо — бул биздин милдетибиз. Мектепке болгон сүйүүбүздү, урмат-сыйыбызды мына ушул иш-аракеттер аркылуу көрсөтө алабыз.
Сиздерди тартиптүү, жоопкерчиликтүү жана тыкан окуучу болууга чакырабыз. Билимге умтулуп, мугалимдердин берген ар бир сабагын баалап, ата-энебиздин, мугалимдерибиздин жана мекенибиздин ишенимин актагыла!
Жаңы окуу жылында баарыңыздарга ийгилик, жаңы бийиктиктерди багынтууңарды каалайбыз!
Мектеп администрациясы