Кылымдын таалимин алып, элдин кызматын өтөгөндөр

100 жылдык тарыхка ээ болгон профессор Айдаркан Молдокулов атындагы Улуттук инновациялык технологиялар мектеп-лицейи — кылым ичинде миңдеген улан-кыздарды билим жана тарбия менен сугарган ыйык уя. Бул билим ордосун аяктаган бүтүрүүчүлөр бүгүнкү күндө коомдун бардык тармактарында — илим-билимде, маданиятта, медицинада, экономикада, мамлекеттик кызматта жана технология дүйнөсүндө — өз ордун таап, өлкөнүн өнүгүшүнө чоң салым кошуп келишет.

УИТМЛдин бүтүрүүчүлөрүнүн арасында өлкө келечеги үчүн жигердүү эмгектенип жаткан бир катар инсандарды мисал келтирүүгө болот:

Тургунов Шекербек — Талас облусунун Чыңгыз Айтматов райондук мамлекеттик администрациясынын башчысынын биринчи орун басары. Ал мамлекеттик башкаруу тармагында жергиликтүү калктын турмушун жакшыртуу багытында иш алып барып келет.

Сарымсаков Бакытбек — техникалык илимдердин кандидаты, доцент, жана учурда Бишкек шаарынын мэриясынын муниципалдык инспекциясында укуктук камсыздоо боюнча адис болуп иштөөдө. Анын илимий жана административдик ишмердүүлүгү — билимдин, тынымсыз эмгектин жана кесипкөйлүктүн айкын үлгүсү.

Назира Сайныкадырова — ОсОО "Аэро Кыргызстан" компаниясынын лаборатория башчысы. Ал авиация тармагында тактыкты жана коопсуздукту камсыздоодо жооптуу жана маанилүү кызматты аркалап келет.

Бул бүтүрүүчүлөр — УИТМЛде калыптанган негизги баалуулуктардын жана мугалимдердин талыкпаган эмгегинин жандуу күбөлөрү. Алар кайсы гана кызматты аркалашпасын, билимге, элге кызмат кылууну башкы максат кылып келишет.

УИТМЛ — мекенчилдикти, билимдүүлүктү жана инсандык сапатты калыптандырган мектеп.